Lagos de Saliencia

Desde Saliencia (Parque Natural de Somiedo - Asturias) chegamos ao Alto da Farrapona ou Collada de Balbarán, lugar de paso ao municipio leonés de San Emiliano.
Iniciamos aquí o camiño a pé. Despois dunha suave baixada de aproximadamente un quilómetro aparece o Lago de La Cueva (segunda imaxe).
Nesta paraxe son aínda evidentes as cicatrices producidas no terreo pola explotación de ferro da mina de Santa Rita, actualmente abandonada.
O itinerario continúa pola antiga pista da mina. Máis arriba, ábrese o horizonte e queda á vista a espléndida pradería de Cerveriz (imaxe terceira), e o lago do mesmo nome, ao abrigo do Albo oriental, cos seus 2.109 metros.
O camiño prosegue en dirección sueste para descubrir finalmente o gran Lago de Calabazosa (quinta fotografía), que é o maior dos tres. Ocupa a depresión dunha dolina escavada por disolución da calcaria e impermeabilizada despois polo depósito de sedimentos glaciares.

Tras retroceder ata Cerveriz, podemos observar a impresionante veiga de Camayor de suaves pastos subalpinos.
Paga a pena subir aos Bígaros e contemplar a imaxe panorámica do Val de Saliencia e os montes de Somiedo (última fotografía).  

En homenaxe a Carlos Magariños, Fernando Arca e Pablo Viqueira.