De Malpica a Niñóns

O 7 de decembro de 2012 saían 6 trasnos e dous cans coa única premisa de unir Malpica con Fisterra pola beira do mar. Un ano máis tarde creouse a Asociación do Camiño dos Faros. E o 27 de outubro de 2017, a Deputación da Coruña aprobou o financiamento para a homologación do sendeiro.

É moi importante o traballo desenvolvido, agora chega o momento da sinalización e da futura conservación.

A Asociación de Antigos Alumnos e Amigos da Universidade de Santiago contribúe a promoción deste Camiño da mellor das maneiras, difundíndoo entre os seus asociados e percorrendo cada unha das etapas.

As Sisargas son un capricho da natureza, un verdadeiro paraíso ornitolóxico. Contémplanse durante moito tempo desde o monte Beo, pero tamén desde Punta Cherpa e Punta Nariga. 

Despois de percorrer as praias de Beo, Ceiruga e Barizo, o corpo precisa un pouco de enerxía para ascender ao monte Nariga, cheo de rochas zoomorfas, cabalos, reptís, aves,... Na Punta Nariga está o faro máis novo do Camiño, construiuse en 1995 e ten un alcance de 22 millas.

Nesta costa hai que ir con moito ollo e colocar ben os pés, non ter présa e deleitarse coas cores da auga. 

De Malpica a Niñóns, 22 quilómetros cheos de sensacións únicas.

Imaxes:

1.- Mapa

2.- Illas Sisargas, monte Beo e Punta Cherpa

3.- Praia de Beo

4.- Faro Nariga

5.- O Atlante na proa, en Punta Nariga

6.- Praias de Niñóns e Morro

7.- Fonte do cano de folla
8.- Crocus do monte Beo

Crónica de Manuel Fraga Carou, en elcompostelano.online 

Máis fotografías na galería de Flickr