Tesouros de Pontedeume

O Concello de Pontedeume organizou a I Andaina histórico-cultural, da que destacamos tres tesouros singulares.

En primeiro lugar, a igrexa de San Miguel de Breamo, expoñente do románico galego. A súa  construción iniciouse en 1187. Foi cabeceira dun mosteiro de cóengos agostiños. Planta de cruz latina, rematada por tres ábsidas semicirculares.

É un lugar máxico, cheo de lendas. Na saída polo oeste, pode verse a Torre de Hércules, a menos de dez millas de distancia. 

Unha das árbores monumentais e senlleiras de Pontedeume é o teixo da casa dos Tenreiro. Cos seus 300 anos, está revivindo pola parte leste. Precisa protección e moitos coidados. O seu uso como miradoiro e merendeiro non foi o máis axeitado.

A outra árbore eumesa senlleira, o metrosidero, goza de boa saúde. Pode contemplarse nos xardíns de Lombardero que están á beira do Torreón dos Andrade. 

E finalmente, non deixes de visitar o Castelo dos Andrade, do século XIV, un auténtico miradoiro. A parte mellor conservada é a torre da homenaxe, con 20 metros de altura.

Para rematar a festa, Cantina Río Covés, onde se pode degustar a costrada, un dos pratos máis representativos de Pontedeume.

Que cante o merlo.

Imaxes:
1.- Torreón dos Andrade. Saída da Andaina.
2/3.- San Miguel de Breamo.
4/5.- Teixo da casa dos Tenreiro.
6.- Castelo dos Andrade.