Faro de Cabo Vilán, un lugar único na Costa da Morte

43º 09' 36'' N, 9º 12' 42'' O son as coordenadas do faro de Cabo Vilán, situado ao noroeste de Camariñas. Torre troncopiramidal, de fuste octogonal, cun torreón de base cilíndrica. A luz está a 104 metros sobre o nivel do mar e 24 metros sobre o terreo base. O alcance da mesma é de 30 millas náuticas. Os autores do proxecto foron os enxeñeiros Francisco Lizárraga e Adolfo Pequeño, coa realización de Vicente Bermúdez, entre 1890 e 1896. Nesta segunda imaxe pode contemplarse o illote do Vilán de Fora. Á nosa dereita, polo nordés aparecen Cabo Tosto ou punta do Boi, co seu cemiterio dos ingleses do Serpent (1890); polo sudoeste, a punta da Barca de Muxía e o cabo Touriñán. Illas Sisargas, punta Nariga, Roncudo, Laxe, cabo Vilán, punta da Barca, Touriñán, Fisterra, Cee, Illas Lobeiras, Lariño e Monte Louro, 12 faros para percorrer a Costa da Morte.

Serie: Lugares únicos, autor das fotografías: Antonio Posse (Cabo Vilán e Mar de Camelle). Fontes bibliográficas: "Polos faros da Costa da Morte", de Xosé María Lema Suárez, Manuel Vilar Álvarez e Manuel Suárez Suárez; "Aeroguía del litoral de Galicia", de Editorial Planeta e José Antonio Silva.